కృతజ్ఞతాభివందనాలు
వనం జ్వాలా నరసింహా రావు
జై శ్రీమన్నారాయణ
ఓం అస్మద్గురుభ్యో నమః
నేను రామాయణం చదువుతానని, అదీ వాసు దాసు గారి శ్రీ మదాంధ్ర వాల్మీకి రామాయణం చదవ గలుగుతానని ఎప్పుడు అనుకోలేదు. ఏడేళ్ల క్రితం, అనుకోకుండా, శ్రీ రంగనాద స్వామిని దర్శించుకునే భాగ్యం కలిగింది. హైదరాబాద్ తిరిగొచ్చి ఇంటికి చేరుకోగానే, పొరుగు నున్న శ్రీమాన్ చిలకపాటి విజయ రాఘవాచార్యులు, సుందర కాండ మందరం చేతిలో పెట్టి చదవమని ప్రోత్సహించారు. అది నేను ఊహించని విషయం. చదివి తెలుసుకున్న విషయాన్ని పదిమందితో పంచుకోవాలని, సాధ్యమైనంత శిష్ట వ్యావహారిక భాషలో, సుందర కాండ మందర మకరందంగా రాశాను. స్నేహితుల సహాయంతో రెండు ముద్రణలకు నోచుకుందా పుస్తకం. అనుకున్న తడవుగానే దాన్ని ముద్రించ గలనని నేను ఊహించలేదు. అంతా దైవానుగ్రహం. ఆ అనుగ్రహంతోనే బాల కాండ మందరం కూడా చదవ గలిగాను. చదివిన విషయాన్ని మందర మకరందంగా రాయ గలిగాను.
ప్రత్యక్ష దైవమైన "శ్రీ శ్రీ శ్రీ త్రిదండి చిన్న శ్రీమన్నారాయణ రామానుజ జీయర్ స్వామి వారి" మంగళా శాసనముల కొరకు, ఆయన ప్రియ శిష్యుడు శ్రీ ఎర్నేని రామారావు తోడ్పాటుతో, బాల కాండ మందర మకరందం డమ్మీ కాపీని స్వామి వారికి అందచేయడానికి ఆశ్రమానికి వెళ్లాను సతీ సమేతంగా. దైవానుగ్రహం వల్ల, ఆశీస్సులతో పాటు, నా కోరిక మేరకు, ఉపోద్ఘాతం రాయడానికి స్వామి వారు అనుగ్రహించారు. వారం రోజుల తర్వాత శ్రీరాం నగర్ లోని జీయర్ ఇంటెగ్రేటెడ్ వేదిక్ అకాడమీ ప్రాంగణంలోని దివ్య సాకేతంలో బ్రహ్మోత్సవాలు నిర్వహిస్తున్న సందర్భంలో వెళ్లిన మా దంపతులను, దగ్గరకు పిల్చిన జీయర్ స్వామి, నేనూహించని విధంగా అనుగ్రహించారు. "జీయర్ శతాబ్ది శత గ్రంథ ముద్రణ పథకం” లో భాగంగా, ఒక పుష్పంగా, "బాల కాండ మందర మకరందం" ముద్రించు తామని స్వయంగా తెలియచేశారు. అంత కంటే అదృష్టం ఏం కావాలి? స్వామి వారి ఆదేశం మేరకు పుస్తకం సాఫ్ట్ కాపీని సీతా నగరంలోని జెట్ కార్యాలయానికి అంద చేశాను.
స్వామి వారి ఆదేశాల మేరకు పుస్తక ముద్రణ చేపట్టిన తర్వాత మరొక్క మారు స్వామిని కలిసే అవకాశం దొరికింది. ఆ సందర్భంలో, స్వామి వారి సూచన మేరకు, దివ్య సాకేతంలో, మందర మకరందం పుస్తకం కవర్ పేజీకి, స్వయంగా వారే ఎంపిక చేసిన. ముఖ చిత్రం నమూనాను చూశాను. స్వామి వారి అనుగ్రహం మరోసారి ఆ విధంగా కలిగినందుకు అదృష్టవంతుడిగా భావించాను.
అడగందే అమ్మైనా పెట్టదంటారు. కాని, అడక్కుండానే, మాతృ వాత్సల్యంతో, నేను రాసిన "బాల కాండ మందర మకరందం" పుస్తకాన్ని ముద్రించి, పలువురికి, ఆ పుస్తకాన్ని చదివే అవకాశం కలిగించిన ప్రత్యక్ష దైవం "శ్రీ శ్రీ శ్రీ త్రిదండి చిన్న శ్రీమన్నారాయణ రామానుజ జీయర్ స్వామి వారికి" శిరస్సు వంచి పాదాభి వందనం చేసుకుంటూ, అనేకానేక కృతజ్ఞతలు తెలియ చేసుకుంటున్నాను. ఆయన ఆశీస్సులతో, మంగళా శాసనములతో, అనుగ్రహంతో వెలుగు చూసిన ఈ పుస్తకం పాఠకుల ఆదరాభిమానాలు చూరగొంటుందని భావిస్తూ, మరొక్క మారు జీయర్ స్వామికి కృతజ్ఞతలు తెలియ చేసుకుంటున్నాను.
జ్వాలా నరసింహా రావు
అనువక్త-వాచవి, బాల కాండ మందర మకరందం
జులై 1, 2010
శ్రీ వికృతినామ సంవత్సర జ్యేష్ఠ మాసం
బహుళ పంచమి
No comments:
Post a Comment