శాన్ ఫ్రాన్ సిస్కో- ఉత్తర దిశ అమెరికా
మధ్య వారధి-"గోల్డెన్‌ గేట్ వంతెన"
వనం జ్వాలా నరసింహారావు
ఇంద్ర ధనుస్సును తలదన్నే శోభాయమాన రంగులతో-వీనులకు విందైన ధ్వనులతో-అందంగా అలరారే వింత వింత కాంతులతో రంజిల్లుతూ, అద్భుతమైన భారీ శిఖరాలు-కేబుల్లు కలిగి, చాలా పొడుగ్గా వుండే, శాన్ ఫ్రాన్ సిస్కో "గోల్డెన్‌ గేట్ బ్రిడ్జ్" ప్రపంచంలోని అత్యంత సుందరమైన వంతెనల్లో అగ్రస్థానంలో వుంటుందంటారు. సముద్ర గర్భం నుండి ఆవిర్భవించి, ఆకాశాన్ని తాకుతున్నదా అన్న చందాన కనిపించే ఈ పసిఫిక్ మహా సముద్రం పైన కట్టిన "వారధి" ని తనివితీరా చూసేందుకు, సంవత్సరం పొడుగూ-ముఖ్యంగా వేసవి రోజుల్లో, సుమారు కోటి మంది పర్యాటకులు వస్తుంటారని అంచనా. అద్భుతమైన ఆ వంతెన వరకు వెళ్లి, దాని మీదుగా ప్రయాణం చేసి, ఆ పక్కకు చేరుకుని, అలా నిలబడి ఎన్ని గంటలు గడిపినా తనివి తీరదనే అనాలి. ఇక దానిపై నడవడం గాని, సైకిల్ మీద తిరగడం గాని చేయడమంటే, ఏదో అడ్వంచర్ చేస్తున్న అనుభూతి కలుగుతుంది.
"బే బ్రిడ్జ్" లాగా, ఇది కూడా శాన్ ఫ్రాన్ సిస్కో, ఓక్ లాండ్ లను కలిపి, రెండు ప్రాంతాల మధ్య, రవాణా సౌకర్యం సులభ తరం-వేగవంతం చేస్తుంది. అమెరికా ఉత్తర-దక్షిణ అంతర్ రాష్ట్ర రహదారి-హైవే లో, పసిఫిక్ మహా సముద్రం మీద నిర్మించిన "గోల్డెన్‌ గేట్ బ్రిడ్జ్", ఓక్ లాండ్ తో సహా, శాన్ ఫ్రాన్ సిస్కో - ఉత్తర దిశగా వున్న అమెరికన్ కౌంటీలకు మధ్య కీలకమైన వారధిగా రాక పోకడలకు ఉపయోగ పడుతున్నది.
వంతెనను-ఆ ప్రాంతాన్ని చూసేందుకొచ్చే పర్యాటకుల సౌకర్యం కొరకు, విస్తృతమైన ఏర్పాట్లుంటాయక్కడ. అనేక పక్కలనుంచి బ్రిడ్జ్ ను వీక్షించేందుకు చేసిన ఏర్పాట్లలో కార్ పార్కింగ్, పబ్లిక్ రవాణా సౌకర్యం, విశ్రాంతి గదులుంటాయి. ఈ సౌకర్యాలను ఈశాన్యం వైపు, ఆగ్నేయం వైపు ఏర్పాటు చేసారు.
గోల్డెన్‌ గేట్ వంతెన "సస్పెన్షన్" తరహా సాంకేతిక నైపుణ్యంతో నిర్మించిన బ్రిడ్జ్. శాన్ ఫ్రాన్ సిస్కో సాగర తీరం వైపున వున్న "గోల్డెన్‌ గేట్" దగ్గర ఆరంభమై, పసిఫిక్ మహా సముద్రం మీదుగా సాగుతుంది. 1937లో, వంతెన నిర్మాణం పూర్తి కాగానే, యావత్ ప్రపంచంలో, ఇది అతి పొడుగాటి సస్పెన్షన్ బ్రిడ్జ్ గా-శాన్ ఫ్రాన్ సిస్కో, కాలిఫోర్నియాలకు అంతర్జాతీయ ప్రాముఖ్యతను సంతరించిపెట్టిందిగా పేరు తెచ్చుకుంది. ఆ తర్వాత కాలంలో ఇలాంటివి మరికొన్ని నిర్మించబడడంతో, వాటిల్లో ఇదొకటయింది. ఇప్పటికీ, అమెరికాలో రెండవ అతి పెద్ద సస్పెన్షన్ బ్రిడ్జ్ ఇదే. బ్రిడ్జ్ నిర్మాణం జరగుకముందు, శాన్ ఫ్రాన్ సిస్కో నుంచి, సమీపంలోని సముద్రానికి అటు దిక్కుగా వున్న మారిన్ కౌంటీకి వెళ్లాలంటే, సముద్ర ప్రయాణమే ఏకైక మార్గం. సముద్రం మీద, అక్కడున్న పరిస్థితుల దృష్ట్యా వంతెన నిర్మాణం అప్పట్లో దుర్లభమే అనుకున్నారు. సముద్ర లోతు. అలల వేగం, గాలి వేగం, పొగమంచు అన్నీ పెను సవాళ్లుగా వున్నప్పుడు నిర్మాణం చేసేందుకు ప్రయత్నాలు మొదలయ్యాయి.
కవి హృదయం వున్న ఒక ఇంజనీరింగ్ విద్యార్థి తన గ్రాడ్యుయేషన్ థీసిస్‌ కొరకు చేసిన డిజైన్ ఆధారంగా, అతడు సూచించిన తక్కువ వ్యయం అంచనాలను దృష్టిలో వుంచుకొని, ఇతర నిపుణుల సలహా సంప్రదింపులను తీసుకొని నిర్మాణం చేపట్టారు. మూడున్నర కోట్ల డాలర్ల అంచనా వ్యయంతో జనవరి 5, 1933 న ఆరంభమైన నిర్మాణం, సుమారు నాలుగేళ్లలో 1937 లో పూర్తయింది. అమెరికాలో-కాలిఫోర్నియా రాష్ట్రంలో-శాన్ ఫ్రాన్ సిస్కోలో అపురూపమైన దర్శనీయ స్థలంగా ప్రఖ్యాతి కాంచింది.
No comments:
Post a Comment