సెక్షన్ 8 అవినీతికి రక్షణా?

సెక్షన్ 8 అవినీతికి రక్షణా?

నమస్తే తెలంగాణ (16-06-2015)

ఏడు దశాబ్దాల ప్రజాస్వామిక పరిపాలనా చరిత్రగల భారత దేశంలో, ప్రతి ఐదేండ్లకు బ్యాలట్ ద్వారా ప్రభుత్వాలు మారే ఈ దేశంలో, ఎంత శక్తిమంతులైనా చట్టానికి అతీతులు కారు. ఎంతటి ఉన్నత స్థానంలో ఉన్నవారైనా, ముఖ్యమంత్రులు, కేంద్ర మంత్రులయినా, మాజీ ప్రధాన మంత్రి కూడా న్యాయ ప్రక్రియకు బద్ధులు కావలసి వచ్చింది, ఇంటరాగేషన్‌ను ఎదుర్కోవలసి వచ్చింది. కొందరు జైలుకు కూడా వెళ్ళారు. ఎవరూ చట్టానికి అతీతులు కారు. చట్టం తన పని తాను చేసుకుపోతుంది. తాను దోషిని కాదని చెప్పుకోవడం కాదు, తన నిర్దోషిత్వాన్ని నిరూపించుకోవాలె.

హైదరాబాద్‌లో శాంతిభద్రతలను, వ్యక్తిగత స్వేచ్ఛను, పౌరుల ఆస్తిని కాపాడడం కోసం గవర్నర్‌కు అధికారాలు ఇవ్వాలని, ఇందుకోసం ఏపీ పునర్వ్యవస్థీకరణ చట్టంలో ని ఎనిమిదవ సెక్షన్ ప్రకారం మార్గదర్శకాల ను రూపొందించాలని ఏపీ ముఖ్యమంత్రి చంద్రబాబు నాయుడు రాష్ట్రపతిని, ప్రధానిని కోరినట్టు వార్తలు వచ్చాయి. ఆయన ఈ అభ్యర్థన చేయడానికి ముందు తన నివాసం ముందు భద్రత కోసం ఉండే తెలంగాణ పోలీసులను తొలగించి వారి స్థానంలో ఏపీ పోలీసుల బలగాలను పెట్టుకున్నారు. ఓటుకు నోటు కుంభకోణంలో తమ పార్టీ శాసనసభ్యుడు ఒకరిని రెడ్ హాండెడ్‌గా పట్టుకొని, అరెస్టు చేసి, ఇంటరాగేషన్ చేసిన నేపథ్యంలో, తాను అరెస్టవుతాననే భయంతో నాయు డు ఈ విధంగా వ్యవహరించి ఉంటారు.

నామినేటెడ్ ఎమ్మెల్యే స్టీవెన్సన్‌ను ప్రలోభపెట్టే క్రమంలో ఆయనతో మాట్లాడుతున్న చంద్రబాబు మాటలను పలు చానెల్స్ ప్రసారం చేశాయి. చానెల్స్‌లో ప్రసారమైన ఆడియో టేపులలోని గొంత తనది కాదని ఇప్పటి వర కు చంద్రబాబు ఖండించలేదు. అందువల్ల తాను అరెస్టు నుంచి తప్పించుకోవడానికి ఎనిమిదవ సెక్షన్ సులభమైన మార్గమని చంద్రబాబు భావించి ఉంటారు. కానీ ఏపీ పునర్విభజన చట్టంలోని ఎనిమిదవ సెక్షన్ అవినీతికి, లంచాలకు పాల్పడిన వారిని కాపాడడానికే ఉద్దేశించినదా? లేక దానిలో మరేదైనా ఇమిడి ఉన్నదా? చంద్రబాబు ఎనిమిదవ సెక్షన్ ద్వారా రక్షణ పొందడానికి ప్రయత్నిస్తూనే, తనను కాపాడుకోవడానికి తనకంటూ సొంత వాదనలు తయారు చేసుకుంటున్నారు.

అవినీతి, లంచగొండితనం వంటి విషయాలలో జోక్యం చేసుకోవాల ని పునర్విభజన చట్టం ఎనిమిదవ సెక్షన్‌లో ఎక్కడా లేదు. ఏపీ పునర్విభజన చట్టంలో హైదరాబాద్‌ను ఉమ్మడి రాజధానిగా పేర్కొన్నప్పటికీ, అది తెలంగాణకు మాత్రమే శాశ్వత రాజధాని. ఏపీకి పదేండ్లు మించకుండా రాజధానిగా ఉంటుంది. హైదరాబాద్ తెలంగాణ భౌగోళిక, పరిపాలనా పరిధిలోనే ఉంటుంది. ఆచరణలో అన్ని విధాలా హైదరాబాద్ తెలంగాణ అంతర్భాగం, దీనిని తెలంగాణ ప్రభుత్వమే పాలిస్తుంది. ఇక్క డి పౌరుల ప్రాణాలు, భద్రత, ఆస్తులకు సంబంధించి మాత్రమే గవర్నర్‌కు ప్రత్యేక బాధ్యత ఉంటుంది. ఉమ్మడి రాజధాని ప్రాంతంలోని శాంతి భద్రతలు, ప్రాణాలు, కీలక ప్రదేశాల భద్రత, ప్రభుత్వ భవనాల కేటాయింపు, నిర్వహణలకు సంబంధించి మాత్రమే గవర్నర్ బాధ్యత విస్తరించి ఉంటుంది.

ఇందుకు సంబంధించి కూడా గవర్నర్ తెంగాణ రాష్ట్ర మంత్రి మండలిని మాత్రమే సంప్రదించాల్సి ఉంటుందే తప్ప, మరే రాష్ర్టాన్ని కాదు. లంచం, అవినీతికి సంబంధించి ఈ సెక్షన్ ఎనిమిది విస్తరించి ఉంటుందని ఎక్కడా లేదు. లంచగొండితనం శాంతిభద్రతల కిందికి, ఆంతరంగిక భద్రత, కీలక సంస్థల భద్రత కిందికి వస్తుందా? ప్రజల ప్రాణాలు, స్వేచ్ఛ, ఆస్తుల పరిరక్షణకు కిందికి లంచగొండితనం కూడా వస్తుందా? గవర్నర్ సెక్షన్ ఎనిమిది కింద జోక్యం చేసుకొని ప్రత్యే క బాధ్యతలు చేపట్టే ఘటన ఈ ఏడాది కాలంలో ఒక్కటైనా జరిగిందా? చంద్రబాబు నాయుడు ఈ మేరకు ఫిర్యాదు చేసే సందర్భం ఎప్పుడైనా వచ్చిందా? టీవీ చానెల్స్‌లో తన గొంతు గల ఆడియో ప్రసారం చేసినప్పుడు మాత్రమే చంద్రబాబుకు ఈ ఎనిమిదవ సెక్షన్ గుర్తుకు వచ్చింది.

రాజ్యాంగం ప్రకారం శాంతిభద్రతలు రాష్ట్ర ప్రభుత్వ పరిధిలో ఉంటా యి. ప్రతి రాష్ర్టానికి తమ డిజిపి నేతృత్వంలోని పోలీసు బలగాలు ఉంటాయి. ఏసీబీ వంటి సంస్థలు ఆయా రాష్ట్ర ప్రభుత్వాల కింద ఉంటా యి. ప్రతి రాష్ట్రం ఆ ముఖ్యమంత్రి కింద ఉంటుంది. నగరాలు, గ్రామీణ ప్రాంతాలలో శాంతిభద్రతల నిర్వహణ బాధ్యత ఆ రాష్ట్ర పోలీసు విభాగానికి ఉంటుంది. ఇతర రాష్ట్ర ముఖ్యమంత్రి లేదా ఇతర ప్రముఖుడు వచ్చినప్పుడు వారికి భద్రత కూర్చే బాధ్యత రాష్ట్ర ప్రభుత్వానికి ఉంటుంది.

ఏ ముఖ్యమంత్రి ఇతర రాష్ట్రం వెళ్ళినప్పుడు తమ వెంట సొంత రాష్ట్ర పోలీసులను, భద్రతా సిబ్బందిని తమ వెంట తీసుకపోరు. చంద్రబాబు నాయుడుకు కూడా ఇదే సూత్రం వర్తిస్తుంది. ఆయన తెలంగాణలో అంతర్భాగమైన హైదరాబాద్‌లో ఉన్నంత వరకు ఇక్కడి రాష్ట్ర పోలీసుల ద్వారా మాత్రమే భద్రత పొందాలె. సొంత రాష్ట్ర పోలీసుల ను ఏర్పాటు చేసుకోవడం రాజ్యాంగ స్వభావానికి విరుద్ధం. ఒక రాష్ట్ర పోలీసు సిబ్బంది ఇతర రాష్ట్రంలో ప్రవేశించి దర్యాప్తు చేయాలన్నా, అరెస్టు చేయాలన్నా, పోలీసు సంబంధిత ఏదైనా బాధ్యత నిర్వహించాలన్నా, ఆ రాష్ట్ర పోలీసును మొదట సంప్రదించాల్సిందే. తమ ఇష్టానుసారం శాంతిభద్రతల నిర్వహణ సాగించే వీలుండదు.

ఏడు దశాబ్దాల ప్రజాస్వామిక పరిపాలనా చరిత్రగల భారత దేశంలో, ప్రతి ఐదేండ్లకు బ్యాలట్ ద్వారా ప్రభుత్వాలు మారే ఈ దేశంలో, ఎంత శక్తిమంతులైనా చట్టానికి అతీతులు కారు. ఎంతటి ఉన్నత స్థానంలో ఉన్నవారైనా, ముఖ్యమంత్రులు, కేంద్ర మంత్రులయినా, మాజీ ప్రధాన మంత్రి కూడా న్యాయ ప్రక్రియకు బద్ధులు కావలసి వచ్చింది, ఇంటరాగేషన్‌ను ఎదుర్కోవలసి వచ్చింది. కొందరు జైలుకు కూడా వెళ్ళారు. ఎవరూ చట్టానికి అతీతులు కారు. చట్టం తన పని తాను చేసుకుపోతుంది. తాను దోషిని కాదని చెప్పుకోవడం కాదు, తన నిర్దోషిత్వాన్ని నిరూపించుకోవాలె. సమస్యను పక్కదారి పట్టించవద్దు.