శేషప్ప కవి రచించిన నరసింహ శతకం-X : వనం జ్వాలా నరసింహారావు

శేషప్ప కవి రచించిన నరసింహ శతకం-X

వనం జ్వాలా నరసింహారావు

ధర్మపురి క్షేత్ర నరసింహ స్వామికి మహా భక్తుడైన శేషప్ప కవి రచించిన నరసింహ శతకంలోని పద్యాలను యధాతధంగా నా బ్లాగ్ పాఠకులకు అందించే ప్రయత్నం ఇది. పదిరోజులకొకసారి పది పద్యాల చొప్పున వంద రోజులయ్యేసరికి వీటన్నింటినె నా బ్లాగ్ లో చదవ వచ్చు. (ఇవి పదవ-చివరి విడత పది పద్యాలు). పదిరోజులకొక సారి బ్లాగ్ లో పోస్ట్ చేసిన ఈ పద్యాలను పాఠకులు డౌన్ లోడ్ చేసుకుని భద్రపరుచుకో వచ్చు. నిరంతరం-నిత్యం, వీలున్నప్పుడల్లా పఠించవచ్చు.  

శేషప్ప కవి రచించిన నరసింహ శతకం-91

సీII నీ కథల్ చెవులలో సోకుట మొదలుగా

బులకాంకురము మేన బుట్టువాడు,

నయమైన నీ దివ్యనామకీర్తనలోన

మగ్నుడై దేహంబు మరచువాడు,

ఫాలంబుతో నీదు పాదయుగ్మమునకు

బ్రేమతో దండమర్పించువాడు,

హా! పుండరీకాక్ష; హా రామ! హరి! యంచు

వేడ్కతో గేకలు వేయువాడు,

తేII చిత్తకమలంబునను నిన్ను జేర్చువాడు,

నీదు లోకంబునందుండు నీరజాక్ష!

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-92

సీII నిగమగోచర! నేను నీకు మెప్పగునట్లు

లెస్సగా బూజింపలేను సుమ్మి;

నాకు దోచిన భూషణములు పెట్టెదనన్న

గౌస్తుభమణి నీకు గలదు ముందె;

భక్ష్యభోజ్యముల నర్పణము జేసెదనన్న

నీవు పెట్టితి సుధ నిర్జరులకు;

గలిమికొద్దిగ గానుకల నొసంగెదనన్న

భార్గవీదేవి నీ భార్యయయ్యె;

తేII నన్ని గలవాడ నఖిలలోకాధిపతివి,

నీకు భూషాదులను బెట్ట నెంతవాడ?

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-93

సీII నవసరోజదళాక్ష నన్ను బోషించెడి

దాతవు నీవంచు ధైర్యపడితి;

నామనంబున నిన్ను నమ్మినందుకు దండ్రి!

మేలు నా కొనరింపు నీలదేహ!

భళి భళి! నీయంత ప్రభువు నెక్కడజూడ

పుడమిలో నీ పేరు పొగడవచ్చు;

ముందు జేసిన పాపమును నశింపగ జేసి,

నిర్వహింపుము నన్ను నేర్పుతోడ

తేII బరమ సంతోషమాయె నా ప్రాణములకు

నీ రుణము దీర్చుకొననేర నీరజాక్ష!

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-94

సీII ఫణుల పుట్టల మీద బవ్వళించినయట్లు

పులుల గుంపున జేర బోయినట్లు,

మకరి వర్గంబున్న మడుగు జొచ్చినయట్లు,

గంగదాపున నిండ్లు గట్టినట్లు,

చెదలభూమిని జాప చేర బరచినట్లు,

తోలుతిత్తిని బాలు పోసినట్లు,

వెర్రివానికి బహువిత్త మిచ్చినయట్లు,

కమ్మగుడిసె మందు గాల్చినట్టు,

తేII స్వామి! నీ భక్తవరులు దుర్జనులతోడ

జెలిమిజేసిన యటులైన జేటువచ్చు;

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-95

సీII దనుజ సంహార! చక్రధర! నీకు దండంబు

లిందిరాధిప! నీకు వందనంబు,

పతితపావన! నీకు బహునమస్కారముల్,

నీరజాత దళాక్ష నీకు శరణు,

వాసవార్చిత! మేఘవర్ణ! నీకు శుభంబు,

మందరధర! నీకు మంగళంబు,

కంబుకందర! శార్జ్ఞకర! నీకు భద్రంబు;

దీనరక్షక! నీకు దిగ్విజయము;

తేII సకల వైభవములు నీకు సార్వభౌమ!

నిత్య కళ్యాణములు నగు నీకు నెపుడు;

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-96

సీII మత్సావతారమై మడుగులోపల జొచ్చి

సోమకాసురు ద్రుంచి చోద్యముగను;

దెచ్చి వేదములెల్ల మెచ్చ దేవతలెల్ల

బ్రహ్మకిచ్చితి వీవు భళి యనంగ;

నా వేదముల నంది యాచారనిష్ఠల

ననుభవించుచు నుందు రవనిసురులు;

సకల పాపంబులు సమసిపోవు నటంచు

మనుజులందరు నీదు మహిమ దెలియ

తేII కుందు, రరవిందనయన! నీ యునికి దెలియు

వారలకు వేగ మోక్షంబు వచ్చు ననఘ!

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-97

సీII కూర్మావతారివై కుధరంబు క్రిందను

గోర్కెతో నుండవా కొమరు మిగుల

వారాహమూర్తివై వనభూములం జొచ్చి

శిక్షింపవా హిరణ్యాక్షు నపుడు

నరసింహమూర్తివై నరభోజను హిరణ్య

కశిపుని ద్రుంచవా కాంతిమీర?

వామనరూపివై వసుధలో బలిచక్ర

వర్తి నణంపవా వైరముంచి?

తేII యిట్టి పనులెల్ల జేయగా నెవ్వరికిని

దగును నరసింహ! నీకిది తగునుగాక;

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-98

సీII లక్ష్మిశ! నీ దివ్య లక్షణగుణముల

వినజాల కెప్పుడు వెర్రినైతి;

నా వెర్రి గుణమును నయముగా ఖండించి

నన్ను రక్షింపుమో నళిననేత్ర!

నిన్ను నే నమ్మితి నితర దైవముల నే

నమ్మలే దెప్పుడు నాగశయన!

కాపాడినను నీవె కష్టపెట్టిన నీవె;

నీ పాదకమలముల్ నిరతి నేను

తేII నమ్మియున్నాను; నీపాద నళినభక్తి

వేగ దయచేసి రక్షింపు వేదవేద్య!

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-99

సీII అమరేంద్రవినుత! నిన్ననుసరించినవారు

ముక్తి బొందిరి వేగ ముదముతోడ

నీపాద పద్మముల్ నెర నమ్మియున్నాను

నాకు మోక్షంబిమ్ము నళిననేత్ర!

కాచి రక్షించునన్ గడతేర్చు వేగమే

నీ సేవకునిజేయు నిశ్చయముగ

గాపాడినను నీకు గైంకర్యపరుడనై

చెలగి నీ పనులను జేయువాడ;

తేII ననుచు బలుమారు వేడెద నబ్జనాభ

నాకు బ్రత్యక్షమగు నిన్నె నమ్మినాను;

భూషణవికాస ! శ్రీ ధర్మపురనివాస

దుష్టసంహార ! నరసింహ ! దురితదూర

శేషప్ప కవి రచించిన నరసింహ శతకం-100

సీII శేషప్పయనుకవి చెప్పిన పద్యముల్

చెవుల కానందమై చెలగుచుండు;

నేమనుజుండైన నెలమి నీ శతకంబు

భక్తితో విన్న సత్ఫలము గలుగు;

జెలగి ఈ పద్యముల్ - చేర్చి వ్రాసినవారు

కమలాక్షు కరుణను - గాంతు రెపుడు

నింపుగా బుస్తకం - బెపుడు బూజించిన

దురిత జాలంబులు - దొలగిపోవు

తేII నిద్దిపుణ్యాకరంబని - యెపుడు జనులు

కష్టమనక పఠించినం గలుగు ముక్తి

భూషణవికాస శ్రీ ధర్మ - పురనివాస

దుష్టసంహార  నరసింహ - దురితదూర!

(సమాప్తం)