జ్వాలా మ్యూజింగ్స్-2 (మోంటిరే బే అక్వేరియం-శాంతా క్రజ్ బీచ్)

శాన్ ఫ్రాన్ సిస్కో సమీపంలోని మోంటిరే బే అక్వేరియం-శాంతా క్రజ్ బీచ్

వనం జ్వాలా నరసింహారావు

శాన్ ఫ్రాన్ సిస్కో- అమెరికా వచ్చిన మర్నాడు కోడలు పారుల్ పుట్టిన రోజు సరదాగా గడిపాం. సెప్టెంబర్ 24, 2009న ఆదిత్య, నేను, శ్రీమతి కలిసి అన్ష్ ను తీసుకొని సమీపంలోని "మోంటిరే బే అక్వేరియం" వెళ్లాం. అన్ష్ బాగా ఎంజాయ్ చేశాడు.

కాలిఫోర్నియా రాష్ట్రంలోని పసిఫిక్ మహాసముద్రం ఒడ్డు నున్న సహజ సిద్ధమైన బ్రహ్మాండమైన "మోంటిరే బే అక్వేరియం" 1984లో నెలకొల్పబడింది. ప్రతి సంవత్సరం సుమారు రెండు కోట్ల మంది దర్శకులు వచ్చిపోతుండే ఈ సుందర ప్రదేశంలో 623 జాతులకు చెందిన 35,000 కు పైగా మొక్కలు, జలచరాలున్నాయి. మోంటిరే బే నుండి, గొట్టాల ద్వారా సముద్ర జలాలను అక్వేరియంలోకి నిరంతరం ప్రవహింప చేసే విధంగా శాస్త్రీయ పద్ధతిలో ఏర్పాట్లు చేశారు నిర్వాహకులు. 33 అడుగుల ఎత్తున వుండి, 13 లక్షల లీటర్ల నీటిని నిల్వ చేయగల సామర్థ్యమున్న నిలువెత్తు వాటర్ టాంక్-దాని గుండా యావత్ సాగర జలచరాలను వీక్షించే ఏర్పాటు, మోంటిరే బే అక్వేరియంలోని ప్రధాన ఆకర్షణ. ప్రపంచం మొత్తంలోనే ఎక్కడా దొరకని అరుదైన కాలిఫోర్నియా "జైంట్ కెల్ప్" (ఎరువులాగా ఉపయోగపడే ఒక రకమైన గడ్డి మొక్క) ను, ఈ వాటర్ టాంక్ లో, జలచరాల నిత్యావసరాలను తీర్చేందుకు పెంచుతుంటారు. ఇలా పెంచడం కూడా ప్రపంచంలో మరెక్కడా జరగదు. బే ప్రదేశానికి సుదూరంలో 45 లక్షల లీటర్ల సముద్రపు నీటిని నిల్వ చేయగల మరో పెద్ద వాటర్ టాంక్ ఇంకో ప్రధాన ఆకర్షణ.

అక్వేరియంలో ప్రదర్శన కుంచిన "స్టింగ్ రేస్", "జెల్లీ ఫిష్", "సీ ఒట్టెర్స్", ఏబై సంవత్సరాల వయసున్న పదకొండు పౌండ్ల బరువు గల "లొబ్ స్టర్" లే కాకుండా, కొన్ని వందల సాగర జలచరాలు, నీళ్లకు ఎగువనా-దిగువన కదలాడు తుంటే, అద్భుతమైన ఆ దృశ్యాన్ని సందర్శకులు మైమర్చి వీక్షిస్తుంటారు. "జెల్లీ ఫిష్" కదలికలకు ఎటువంటి ఇబ్బందికలుగకుండా, ఆసరా లభింప చేసేందుకు, వృత్తాకారంలో నీరు ప్రవహించే సౌకర్యం ఏర్పాటుచేసిన, ప్రత్యేకమైన "క్రైజిల్ టాంక్ “ను ఉపయోగిస్తున్నారు అక్వేరియం నిర్వాహకులు. ఏ జలచరానికి ఎటువంటి అసౌకర్యం కలగకుండా, సహజ వాతావరణంలో జీవించే ఏర్పాట్లెన్నో చేశారిక్కడ. "సాగర సంపద పరిరక్షణను ప్రోత్సహించడం" అక్వేరియం ధ్యేయం-లక్ష్యం.

"మోంటిరే బే అక్వేరియం" డిజైన్ లోనే ఒక ప్రత్యేకతుంది. నిమిషానికి 2000 గాలన్ల సముద్ర జలాలను, రాత్రింబగళ్లు, వందకు పైబడి టాంకుల ద్వారా అక్వేరియంలోకి ప్రవహించే ఏర్పాటు చూడ ముచ్చటగా వుంటుంది. సందర్శకులు రకరకాల చేపలను నీటిపైనా-కిందా, స్పష్టంగా వీక్షించే వీలుగా వడబోసిన పరిశుద్ధమైన జలాలను పగటి సమయంలో ప్రవహింపచేస్తారు. రాత్రివేళల్లో యధా విధి సముద్ర జలాలు, సహజసిద్ధమైన సాగర ఆహారాన్ని దాని వెంట వచ్చే విధంగా, అక్వేరియం టాంకుల్లో ప్రవహిస్తుంటాయి. చెత్త నీరంతా తిరిగి సముద్రంలోకి విడువబడే విధంగా ఏర్పాట్లున్నాయి. పర్యావరణానికి భంగం కలగని రీతిలో, ఎరువుగా ఉపయోగపడే "జైంట్ కెల్ప్" మొక్కల పెరుగుదలకు భంగం కలగని పద్ధతిలో, అసలు-సిసలైన సముద్రమా ఇది అన్న తరహాలో వుంటుంది "మోంటిరే బే అక్వేరియం".

"భారీ తెల్ల షార్క్"ను 16 రోజుల సుదీర్ఘ కాలం పాటు బందీగా వుంచగలిగి, తిరిగి సముద్రంలోకి వదల గలిగిన ఏకైక అక్వేరియం, ప్రపంచంలో "మోంటిరే బే అక్వేరియం" ఒక్కటే. "జువెనైల్ తెల్ల షార్క్"లను పలుసార్లు పట్టుకొని, రవాణా చేసి, కొంతకాలం పాటు అక్వేరియంలో వుంచి, సందర్శకులు వీక్షించిన తర్వాత సముద్రంలోకి వదలగల సామర్థ్యాన్ని సిబ్బంది అలవరచుకున్నారు. అక్వేరియంలో అన్ష్ లాంటి చిన్న పిల్లలు ఆనందంగా గడిపేందుకు, ఎన్నో రకాల వినోదకరమైన ఏర్పాట్లు చేశారు నిర్వాహకులు. అందుకేనేమో, శలవులిస్తే చాలు-నేల ఈనినట్లు వందల-వేల మైళ్ల ప్రయాణం చేసి సందర్శకులు కుటుంబ సమేతంగా వస్తుంటారిక్కడకు. కాలిఫోర్నియా లో, శాన్ ఫ్రాన్ సిస్కోకు అతి సమీపంలో వున్న ఈ అక్వేరియంను పర్యాటకులు సందర్శించి తీరాల్సిందే.

రెండు రోజుల తర్వాత సెప్టెంబర్ 26 సాయంత్రం ఆదిత్య వుంటున్న శాంతా క్లారా-లిక్ మిల్ రోడ్ సమీపంలో, ఓ పాతిక మైళ్ల దూరంలో వున్న "శాంతా క్రజ్ ప్రధాన బీచ్" కు అన్ష్ ను తీసుకొని, అందరం వెళ్లాం. అక్వేరియంకు రావడం కుదరని పారుల్ కూడా బీచ్ అనగానే బయల్దేరింది. మేమెళ్లిన రోజున పెద్దగా జనం లేనందున ఇబ్బంది లేకుండానే పార్కింగ్ దొరికింది. సాధారణంగా అక్కడ పార్కింగ్ దొరకడం కష్టమంటారు. చలికూడా బాగానే వేసింది. ఆదిత్య కొంచెం సేపు మమ్మల్ని రెస్టారెంటులో కూచోబెట్టి, అన్ష్ కిష్టమైన ఆటలాడించడానికి, చుట్టుపక్కల తిప్పాడు. అందరం కలిసి చాలా సేపు సముద్రంలో-బీచ్ లో ఆనందంగా గడిపాం.

శాంతా క్రజ్ బీచ్ వంద సంవత్సరాల పూర్వంనుంచి సందర్శకులను ఆహ్లాద పరుస్తుంది. సుమారు మైలు దూరం పైగా వుంటుందిక్కడ బీచ్. బీచ్ పరిసరాల్లో ఆకర్షణీయమైన ఎన్నో వినోద సౌకర్యాలను నిర్వాహకులు ఏర్పాటుచేశారిక్కడ. ప్రయివేట్ సంస్థ నడుపుతున్న ఈ బీచ్ కు ఆనుకొని వున్న భవన సముదాయం అక్టోబర్ 17, 1989న సంభవించిన భూకంపంలో పగుళ్లకు లోను కావడంతో, పునర్నిర్మించారు తిరిగి. శానోజ్ కు 35మైళ్ల దూరంలోను, మోంటిరేకు ఉత్తర దిశగా 40మైళ్ల దూరంలోను, శాన్ ఫ్రాన్ సిస్కోకు దక్షిణంగా 70 మైళ్ల దూరంలోను వుందీ బీచ్. పారుల్, ఆదిత్య అక్కడ అందరితో కలిసి తీసిన ఫోటోలు ఎప్పటికీ భద్రపరుచుకునే విధంగా వున్నాయి.

ఇక ఆ వారమంతా మేమిద్దరం విశ్రాంతి తీసుకున్నాం గాని, ఆదిత్య-పారుల్ అన్ష్ ను వూళ్లో వున్న వాడానందించే ప్రదేశాలకు తీసుకెళ్లారు. ఆ తర్వాత గురువారం, అక్టోబర్ మొదటి తేదీన, పారుల్ కు ఆఫీస్ కు వెళ్లాల్సిన పని వున్నందువల్ల, మేం ముగ్గురం అన్ష్ ను తీసుకొని "లాస్ ఏంజెల్స్" కు ప్రయాణమై పోయాం.